الرئيسية » سياسة » حوار كامل و طريف جدّا بين الباجي و راشد..تابعوا أقوال الشيخين

حوار كامل و طريف جدّا بين الباجي و راشد..تابعوا أقوال الشيخين

الباجي : هكّة شيخ ما تجي كان ما نكلّمك أنا…؟ حتى مرة ما هزّيت التليفون وقلتلي نعملو قهيوة، موش لازهم على السياسة، يلعن جدّ بوها إذا كان باش تبعدّنا على بعضنا.
راشد : موش على حاجة سي الباجي أما ما نحبّش نزعجك، نعرف مشاغلك برشة ونفضّل باش تاخو انت المبادرة.
الباجي : باهي… آش عملنا توّا في هاك الغشير، الّي طلع ما يصلحش؟
راشد : أنا هو من الغشاشر ؟ عندنا برشة…
الباجي : والله قلت الحق… بخلاف يوسف عنّا زياد العذاري وهذاك عمر الباهي قالولي صاحب يوسف الروح في الروح، وهاك الّي يبعث في شيفورو يجيبلو في الدواء ولاخر هذاك الّي نهار كامل وهو يتضيحك… اسمو الموخّر ولاّ المتأخّر والله نسيت…
راشد : ما تنساش ولدنا حافظ عاد سي الباجي…
الباجي : ماني قلتلك قدّاش من مرة عاوني عليه وانت ما عطيتني صرف من عدل…
راشد : والله بعدك انت يحرم الضمار سي الباجي… أيّا باهي أعطيني الصحيح توّا، أش بيك على يوسف ؟
الباجي : آش أكثر ملّ عملو ؟ ياخي ماكش قاعد تشوف بعينيك؟ في بالك الّي الارقام متاع المؤشرات الاقتصادية الكلّ الّي يعطي فيها مغشوشة؟ نسبة النموّ
والصادرات والاستثمار الخارجي كلّهم فالصو… وفي بالك بالطلعة لخرى متاع 2018 آخر عام صعيب ؟ جدّ عليك توّا ها الكلام ؟ وفي بالك الّي الراجل عفّس على الدستور متاعك الّ عملتو انت وجماعتك ؟
راشد : كيفاش ووقتاش ؟
الباجي : ثبّت روحك تلقى الّي ما عندوش الحق يحذف وزارة كاملة، وزارة الطاقة وما أدراك بجرّة قلم من غير ما يشاور بالمسبّق مجلس الوزراء كيف ما ينصّ الدستور…
راشد : بالله ؟ والله ما جا لبالي… حتى واحد ملّي حولي ما قالي…
الباجي : ما تقلّيشي ما في باليكش زادة بالعشرين مليار الّ خذاها من عند الانقليز، والّ قاعد حسب جماعة الطبوبي يخدّم بهم في الرأي العام، وعلى ما يبدو زادة يشري في جرايد وصحافيين ؟
راشد : زعمة صحيحة الحكاية ؟
الباجي : ما لا لا… صحيحة ونصّ… وفي بالك الّي خلانّا ضحكة في البلاد على حكاية السيارة الشعبية ؟ الناس تشهق ما تلحق وشاقية في قوتها وهو يبشّ فيهم بسيارة شعبية ؟ وفوق هذا الكلّ كذبة! جماعتي عملو الحسابات وظهر الّي مستحيل باش نلقاو كرهبة تسوى أقل من 20 ألف دينار… تي الراجل طلع يهزّ ويصبط ما يعرفش حتى آش يقول.
راشد : ما تلوم كان روحك… موش أنا الّي سمّيتو…
الباجي : الله غالب غلطة… إيه نقعدو نتفرجو فيه هكّة هازز البلاد في هاوية… الماء يجري تحت ساقينا حتى يهزنا الطوفان الناس الكل !
راشد : قُلْ هَلْ نُنَبِّئُكُم بِالْخَْسَِينَ أَعْمَالً
الباجي : ما تنساش الآية لخرى زادة : وَإِذَا قِيلَ لَهُمْ لَا تُفْسِدُوا فِ الْرَْضِ قَالُوا إِنَّمَا نَحْنُ مُصْلِحُونَ
راشد : كانك عليّ أنا والنهضة ما عندناش تعلق بشخص يوسف الشاهد كيف ما قلنا ميات مرة، واذا كان ثمّة شكون يعوّضو من غير ما ندخلو في مرحلة عدم استقرار أيّا نتحدثو…
الباجي : يا راشد خويا تي ساهلة مسهلة موش صعيبة… في ما يخصّ الاستقرار ماو توّا نزيدو ندعّموه بثلاثة ولاّ أربعة وزرة نهضويين أخرين وشويّة كتّاب دولة أخرين ويا ناس ما كان باس…
راشد : معناها نعملو حكومة متناصفة ؟
الباجي : وهو كذلك…
راشد : في المسألة نظر… إيه وشكون رئيس الحكومة ؟
الباجي : يا سيدي اختارو انت.. هات… أكثرشي من هكّة؟ باهيشي؟
راشد : أعطيني 48 ساعة نشاور الجماعة وتوّا نرجعلك… أيّا في وديعة الله توّا..
الباجي : والله ما صارها ! المدام عملت كسكسي بالمنّاني نودّك ولا نشهّيك وقالتلي لازم تشدّ سي راشد للفطور…
راشد : اذا كان هكّة عيب باش نقول لا..
الباجي : أيّا برّة نمشيو ناكلو فَيِّمْ والّ فيه الرضا والخير ربي يسهّل فيه…
راشد : بالله قبل ما ننسى قتلي نزيدو أربعة وزرة وأربعة كتاب دولة من عندنا ؟
الباجي : حتى أكثر موش مشكل جزئيات هذي يا راجل…
راشد : مالاّ قتلي كسكسي بالمنّاني؟
(حوار من وحي الخيال)

الشارع المغاربي

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

بالصور / نسرين بن علي لبية الزردي :”يا عزوزة يا جبن président”..روبتي الي تضحك عليها تبقا عام كامل تخدم عند سامي الفهري باش تشريها !